નેપાળના પ્રખ્યાત પ્રવાસન સ્થળ પોખરામાં શુક્રવારે વહેલી સવારે એક મોટી દુર્ઘટના સર્જાઈ છે. પોખરાની પ્રસિદ્ધ ફેવા લેક (તળાવ) માં બિહાર પાસિંગની એક કાર અચાનક ખાબકતાં કારમાં સવાર 2 ભારતીય નાગરિકોના કરૂણ મોત નીપજ્યા છે, જ્યારે અન્ય 2 ભારતીયો ગંભીર રીતે ઈજાગ્રસ્ત થયા છે. અકસ્માતની જાણ થતાં જ સ્થાનિક પોલીસ અને રાહત ટીમ ઘટનાસ્થળે પહોંચી ગઈ હતી અને ક્રેનની મદદથી કારને પાણીમાંથી બહાર કાઢવાની કામગીરી હાથ ધરી હતી.

મૃતકો પૈકી એકની ઓળખ બિહારના પૂર્વ ચંપારણ જિલ્લાના રક્સૌલ વિસ્તારના રહેવાસી 26 વર્ષીય નવદીપ કુમાર યાદવ તરીકે થઈ છે. જ્યારે બીજા મૃતક ભારતીય નાગરિકની ઓળખ છતી કરવા માટે પોલીસ વધુ તપાસ ચલાવી રહી છે. કારમાં સવાર અન્ય બે ઈજાગ્રસ્તોમાં 27 વર્ષીય અનમોલ કુમાર યાદવ અને 33 વર્ષીય સૂરજ યાદવ (બંને રક્સૌલના રહેવાસી) નો સમાવેશ થાય છે. ઘટનાસ્થળેથી તાત્કાલિક બહાર કાઢીને બંને ઈજાગ્રસ્તોને સારવાર અર્થે ગંડકી મેડિકલ કોલેજ ખાતે ખસેડવામાં આવ્યા છે, જ્યાં હાલમાં તેમની સ્થિતિ સ્થિર હોવાનું જાણવા મળ્યું છે.

ગંડકી પ્રાંત પોલીસ કાર્યાલયના વડા જીતેન્દ્ર બીસીના જણાવ્યા અનુસાર, આ અકસ્માત શુક્રવારે સવારે આશરે 4:50 વાગ્યે સર્જાયો હતો. સેડી વિસ્તારમાંથી લેકસાઇડ તરફ પૂર્ણ ઝડપે જઈ રહેલી કારના ચાલકે કાર પરનો કાબૂ ગુમાવી દીધો હતો. પરિણામે, પોખરા-18 માં આવેલા ગૌરીચૌતરા વળાંક પાસે કાર સીધી ફેવા લેકની ઊંડી ખાઈમાં ખાબકી હતી. દુર્ઘટનાની જાણ થતાં જ રેસ્ક્યૂ ટીમે ઘટનાસ્થળે પહોંચી ક્રેન વડે કચડાયેલી કારને તળાવમાંથી બહાર કાઢી હતી.

​​​​​​​બંને મૃતકોને પાણીમાંથી બેભાન અવસ્થામાં બહાર કાઢીને તાત્કાલિક પોખરા એકેડેમી ઓફ હેલ્થ સાયન્સિસ હોસ્પિટલમાં લઈ જવામાં આવ્યા હતા, જ્યાં હાજર તબીબોએ તેમને મૃત જાહેર કર્યા હતા. પોલીસના પ્રાથમિક અનુમાન મુજબ વળાંક પર કારની તેજ ગતિ અને ચાલકનું અસંતુલન જ આ જીવલેણ અકસ્માતનું મુખ્ય કારણ બન્યું હતું. નેપાળ પોલીસે ઘટના અંગે મૃતકો અને ઈજાગ્રસ્તોના સ્વજનોને તથા ભારતીય દૂતાવાસને જાણ કરી આગળની કાનૂની અને પોસ્ટમોર્ટમ પ્રક્રિયા હાથ ધરી છે.