ચીનના ગુઆંગડોંગ પ્રાંતના ફોશાન શહેરમાં એક ટેક્સટાઇલ ફેક્ટરીમાં અચાનક ભયાનક આગ લાગવાની દર્દનાક દુર્ઘટના સામે આવી છે. આ દુર્ઘટનામાં ઓછામાં ઓછા 8 લોકોના જીવ ગયા છે અને 1 વ્યક્તિ ગંભીર રીતે ઈજાગ્રસ્ત થયો છે. પ્રાપ્ત માહિતી અનુસાર, આ દુર્ઘટના રવિવારે બપોરે આશરે 3 વાગ્યાના સુમારે બની હતી. આ ઘટના બાદ સ્થાનિક વિસ્તારમાં ભારે અફરાતફરી મચી ગઈ હતી અને મોટી સંખ્યામાં ઇમરજન્સી સેવાઓ ઘટનાસ્થળે પહોંચી ગઈ હતી.

ચીનના સરકારી ટેલિવિઝન અહેવાલ મુજબ, આ આગ બપોરે 3:12 વાગ્યે એક ઔદ્યોગિક પાર્ક (Industrial Park) અંદર આવેલી બે માળની ઇમારતમાં લાગી હતી. જોતજોતામાં આગે સમગ્ર ઇમારતને પોતાની લપેટમાં લઈ લીધી હતી. આશરે 1 કલાક સુધી ઇમારત આગની જ્વાળાઓમાં લપેટાયેલી રહી હતી. ફાયર ફાઇટરોએ ભારે જહમત બાદ આશરે 1 કલાક પછી આગ પર કાબૂ મેળવ્યો હતો. જોકે, ત્યાં સુધીમાં 8 લોકો આગમાં ભૂંજાઈ જવાથી કાળધર્મ પામ્યા હતા.

સોશિયલ મીડિયા પર વાયરલ થયેલા અને આંતરરાષ્ટ્રીય ન્યૂઝ એજન્સી રોઇટર્સ દ્વારા વેરિફાઇ કરવામાં આવેલા વીડિયોમાં ફેક્ટરીની ઇમારતમાંથી કાળા ધુમાડાના ગોટેગોટા નીકળતા જોઈ શકાય છે. રાહતની વાત એ રહી કે આગ આસપાસની અન્ય ઇમારતો સુધી ફેલાઈ ન હતી. ઈજાગ્રસ્ત વ્યક્તિને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો છે, જ્યાં તેની સારવાર ચાલી રહી છે.

​​​​​​​ચીન સરકારી મીડિયાના અહેવાલો અનુસાર, ઘટનાસ્થળે રાહત અને બચાવ કામગીરી (Rescue Operation) પૂર્ણ કરી દેવામાં આવી છે. ફેક્ટરીમાં આગ લાગવાનું વાસ્તવિક કારણ હજુ સુધી સ્પષ્ટ થઈ શક્યું નથી. સ્થાનિક પ્રશાસન અને તપાસ એજન્સીઓએ ઘટનાસ્થળે પહોંચીને તપાસનો ધમધમાટ શરૂ કર્યો છે. પ્રાથમિક શોર્ટ સર્કિટ કે ઔદ્યોગિક ક્ષતિના કાર્યોની દિશામાં તપાસ ચલાવવામાં આવી રહી છે.