નાગરિક ઉડ્ડયન નિયમનકાર ડીજીસીએ ભારતની સૌથી મોટી એરલાઇન, ઇન્ડિગોને ફેબ્રુઆરી સુધી તેની ફ્લાઇટ કામગીરી ઘટાડવા માટે કહી શકે છે. આનું કારણ એ છે કે એરલાઇન પાઇલટ્સની તીવ્ર અછતનો સામનો કરી રહી છે. આ અછતને કારણે ઇન્ડિગોના નેટવર્કમાં નોંધપાત્ર વિક્ષેપ પડ્યો છે અને આ મહિને અત્યાર સુધીમાં 5,000થી વધુ ફ્લાઇટ્સ રદ કરવામાં આવી છે. ઇન્ડિગો દરરોજ 2,300 ફ્લાઇટ્સ ચલાવે છે. અહેવાલ મુજબ, એરલાઇનને તેના શિયાળાના સમયપત્રક દરમિયાન દરરોજ 300 ફ્લાઇટ્સ ઘટાડવાનો નિર્દેશ આપવામાં આવી શકે છે. શિયાળાની ઋતુ ઓક્ટોબરના છેલ્લા રવિવારે શરૂ થાય છે અને માર્ચના છેલ્લા રવિવાર સુધી ચાલુ રહે છે.

દરમિયાન, કેન્દ્ર સરકારે એર ઇન્ડિયા અને અન્ય એરલાઇન્સને ઇન્ડિગોના ફ્લાઇટ ઘટાડાને કારણે થતી માંગને પહોંચી વળવા માટે તેમની ફ્લાઇટ કામગીરી વધારવા કહ્યું છે. ડીજીસીએએ આજે ઇન્ડિગોના વરિષ્ઠ અધિકારીઓને બોલાવ્યા છે અને તેમને પૂછવાની અપેક્ષા છે કે એરલાઇન તેની વર્તમાન પાઇલટ્સની સંખ્યા સાથે કેટલી ફ્લાઇટ્સ ચલાવી શકે છે. ઇન્ડિગોને તેની ભરતી યોજના, તાલીમ ક્ષમતા અને ક્રૂ શેડ્યૂલનો વિગતવાર રોડમેપ સબમિટ કરવા માટે કહેવામાં આવ્યું છે, જેના આધારે ડીજીસીએ તેનો નિર્ણય લેશે. તેવું એક વરિષ્ઠ અધિકારીએ જણાવ્યું છે.

અધિકારીએ જણાવ્યું હતું કે, સરકાર સાવચેતી રાખશે કારણ કે આગામી અઠવાડિયાથી ઉત્તર ભારતમાં ધુમ્મસની આગાહી છે, જેના કારણે ફ્લાઇટમાં વધુ વિલંબ અને વિક્ષેપો થવાની ધારણા છે. ઇન્ડિગોના એક વરિષ્ઠ અધિકારીએ જણાવ્યું હતું કે એરલાઇનને તેના સંપૂર્ણ ફ્લાઇટ શેડ્યૂલને સરળતાથી ચલાવવા માટે આગામી ત્રણ મહિનામાં ઉપલબ્ધ પાઇલટ્સની સંખ્યા વધારવાની જરૂર પડશે. કેપ્ટનની સંખ્યા વધારવી એ કોઈપણ એરલાઇન માટે એક જટિલ કાર્ય છે, કારણ કે તેમને ઉડાન ભરવાની મંજૂરી આપતા પહેલા મહિનાઓની ઇન-ફ્લાઇટ અને ઓન-ગ્રાઉન્ડ તાલીમમાંથી પસાર થવું પડે છે.

ગઈકાલે ઇન્ડિગોએ લગભગ ૧,૬૫૦ ફ્લાઇટ્સનું સંચાલન કર્યું હતું, જે શનિવારે ૧,૫૭૮ ફ્લાઇટ્સ કરતાં થોડું સારું હતું. મોટા વિક્ષેપો પછી એરલાઇન ધીમે ધીમે તેના સમયપત્રકને સ્થિર કરવાનો પ્રયાસ કરી રહી છે. છેલ્લા પાંચ દિવસથી દેશભરના એરપોર્ટ પર હજારો મુસાફરો ફસાયેલા હતા. આના કારણે દેશભરમાં હોબાળો મચી ગયો હતો અને એરલાઇન સામે કાર્યવાહીની માંગણી કરવામાં આવી હતી. ઘણા ઇન્ડિગો ગ્રાહકોએ ફરિયાદ કરી હતી કે એરલાઇન તેમને તેમના ગંતવ્ય સ્થાન પર પહોંચાડવા માટે કંઈ કરી રહી નથી.