કોર્ટ વોરંટની બજવણી કરવા માટે એક પોલીસ હેડ કોન્સ્ટેબલે અનોખો રસ્તો અપનાવ્યો હતો. તે પોલીસ સ્ટેશનમાં જ બેસી રહ્યો અને વાતચીત કરવા માટે એક કાલ્પનિક પાડોશીનો સહારો લીધો. આરોપી ક્યાં છે તે અંગે કથિત રીતે બનાવટી અહેવાલ તૈયાર કરવા બદલ, વેરાવળ પોલીસ સ્ટેશનના પી.એ. પરમાર સામે વિભાગીય તપાસ અને ફોજદારી કાર્યવાહી કરવાનો આદેશ ગુજરાત હાઈકોર્ટે આપ્યો છે.

આ કેસને કારણે હાઈકોર્ટે અદાલતો માટે એવી માર્ગદર્શિકા નક્કી કરવાની જરૂરિયાત અનુભવી છે કે કોઈ આરોપીને 'ભાગેડુ' જાહેર કરતા પહેલા કઈ બાબતોનું ધ્યાન રાખવું જોઈએ. કોર્ટે સ્પષ્ટ કર્યું છે કે માત્ર વોરંટની બજવણી ન થવાને કારણે કોઈ વ્યક્તિ કાગળ પર આપોઆપ 'ભાગેડુ' બની જતી નથી. આ મામલો અમદાવાદના નિકોલ રોડના રહેવાસી અને છેતરપિંડીના આરોપી સંદીપ શ્રીવાસ્તવ સાથે સંબંધિત છે, જેમનો કેસ ફેબ્રુઆરી ૨૦૨૪માં રાજકોટની અદાલતમાંથી ગીર સોમનાથ જિલ્લાના વેરાવળમાં સ્થાનાંતરિત કરવામાં આવ્યો હતો.

શ્રીવાસ્તવ રાજકોટમાં સુનાવણી દરમિયાન હાજર રહ્યા હતા, પરંતુ તેમના વકીલ એચ. એસ. ટોલિયાના જણાવ્યા અનુસાર, કેસના સ્થાનાંતરણ બાદ તેમને કોર્ટની નોટિસ મળવાનું બંધ થઈ ગયું હતું, જોકે તેઓ તે જ સરનામે રહેવાનું ચાલુ રાખી રહ્યા હતા. મે ૨૦૨૪માં કેસના સ્થાનાંતરણ અંગેની વેરાવળ કોર્ટની નોટિસ તેમની સુધી પહોંચી શકી ન હતી (બજવણી થઈ શકી ન હતી). તેમના વકીલ અને જામીનદારને મોકલેલી નોટિસો પણ બજવણી વિના પરત આવી હતી, અને ડિસેમ્બર ૨૦૨૪માં જારી કરાયેલ જામીનપાત્ર વોરંટની સ્થિતિ પણ આવી જ રહી હતી. ત્યારબાદ ૨૦૨૫માં બિન-જામીનપાત્ર વોરંટ જારી કરવામાં આવ્યું હતું, પરંતુ શ્રીવાસ્તવ પકડમાં આવ્યા નહીં.

જુલાઈ ૨૦૨૫માં, અદાલતે તેને કલમ ૮૨ હેઠળ 'ભાગેડુ' જાહેર કર્યો અને કલમ ૨૯૯ હેઠળ તેની ગેરહાજરીમાં ટ્રાયલ (મુખ્ય કાર્યવાહી) ચલાવવાનો આદેશ આપ્યો.

પોતાની મિલકત જપ્ત થવાની આશંકાને પગલે, શ્રીવાસ્તવે તે અંગેની જાહેરાત રદ કરાવવા માટે હાઈકોર્ટમાં અરજી કરી. સુનાવણી દરમિયાન, જસ્ટિસ એમ. કે. ઠક્કરના પ્રશ્નોને લીધે એક અસામાન્ય બાબત પ્રકાશમાં આવી. હેડ કોન્સ્ટેબલ પરમારે અજય મુંગર નામના વ્યક્તિના નામે એક નિવેદન તૈયાર કર્યું હતું. જે શ્રીવાસ્તવનો પાડોશી હોવાનું જણાવાયું હતું અને તેમાં દાવો કરવામાં આવ્યો હતો કે આરોપીએ પોતાનું સરનામું બદલી નાખ્યું છે. 

આ પાડોશીના અસ્તિત્વ અંગે શંકા જતાં, હાઈકોર્ટે ૩૦ સપ્ટેમ્બરે પોલીસને મુંગરને કોર્ટમાં હાજર કરવાનો આદેશ આપ્યો. ત્યારબાદ પોલીસે કોર્ટને જાણ કરી કે તે કથિત પાડોશી ક્યાંય મળી આવ્યો નથી. કારણ કે આવી કોઈ વ્યક્તિનું અસ્તિત્વ જ નહોતું. હાઈકોર્ટે ચિંતા વ્યક્ત કરી કે પરમારે અન્ય કેસોમાં પણ આવા જ અહેવાલો તૈયાર કર્યા હોઈ શકે છે. કોર્ટે ગીર સોમનાથના એસપીને પરમાર સામે વિભાગીય તપાસ કરવાનો નિર્દેશ આપ્યો અને કહ્યું કે તપાસ એવી રીતે થવી જોઈએ કે તમામ પોલીસ અધિકારીઓને સ્પષ્ટ સંદેશ મળે કે ફરજ બજાવતી વખતે પુરાવા બનાવટી રીતે ઊભા કરવાનો કે ઘડવાનો કોઈપણ પ્રયાસ ગંભીરતાથી લેવામાં આવશે. એસપીએ પરમારને સસ્પેન્ડ કરી દીધા છે અને તપાસ શરૂ કરી છે.

અદાલતનું માનવું હતું કે માત્ર વિભાગીય કાર્યવાહી પૂરતી નથી. ઉચ્ચ અદાલતે જાહેરનામાના આદેશને રદ કરવાની સાથે વેરાવળની અદાલતને નિર્દેશ આપ્યો કે તેઓ "કાયદા હેઠળ નિર્ધારિત યોગ્ય પ્રક્રિયા અનુસર્યા બાદ, ન્યાયિક કાર્યવાહી દરમિયાન ખોટો અહેવાલ રજૂ કરવા બદલ હેડ કોન્સ્ટેબલ પી. એ. પરમાર સામે ફોજદારી કાર્યવાહી શરૂ કરે.