જો તમે સમયસર ઇન્કમ ટેક્સ રિટર્ન (ITR) ફાઇલ કર્યું છે અને તેનો સ્ટેટસ 'Processed' દેખાઈ રહ્યું છે, તેમ છતાં તમારા બેંક ખાતામાં અત્યાર સુધી પૈસા આવ્યા નથી, તો ચિંતા કરવાની જરૂર નથી. તમે યોગ્ય માહિતી અને પ્રક્રિયા દ્વારા જાણી શકો છો કે તમારું રિફંડ ક્યાં અટક્યું છે અને આ સમસ્યાનું નિરાકરણ લાવી શકો છો.

સામાન્ય રીતે આવકવેરા વિભાગ ITR પ્રોસેસ કર્યા પછી ૭ થી ૨૧ કાર્યકારી દિવસોમાં રિફંડ મોકલી આપે છે. જો આનાથી વધુ સમય વીતી ગયો હોય, તો નીચેના પગલાં લેવા જરૂરી છે.

સૌ પ્રથમ: રિફંડનો સમયગાળો સમજો

આવકવેરા વિભાગના મતે રિફંડ મોકલવાની પ્રક્રિયામાં સામાન્ય રીતે ૪ થી ૫ અઠવાડિયાનો સમય લાગી શકે છે. આ સમય તમારી ITR ફાઇલિંગની તારીખ અને પ્રોસેસિંગની ઝડપ પર આધાર રાખે છે. જો તમારી ITR તાજેતરમાં પ્રોસેસ થયું હોય, તો થોડી રાહ જોવી હિતાવહ છે. પરંતુ જો ઘણા અઠવાડિયા વીતી ગયા હોય, તો તમારે આગળનું પગલું ભરવું જોઈએ.

રિફંડ ન આવ્યું હોય તો આ સ્ટેપ્સ અનુસરો

૧. ઇ-ફાઇલિંગ વેબસાઇટ: સૌ પ્રથમ આવકવેરા વિભાગની ઈ-ફાઇલિંગ વેબસાઇટ https://www.incometax.gov.in/iec/foportal/ પર જાઓ.

૨. લોગિન: તમારા લોગિન વિગતો અને OTP દ્વારા લોગિન કરો.

૩. સ્ટેટસ ચેક કરો: 'Refund / Demand Status' સેક્શનમાં જાઓ. અહીં તમને દેખાશે કે રિફંડ ક્યારે પ્રોસેસ થયું અને કેટલી રકમ મોકલવામાં આવી.

૪. બેંક વિગતો તપાસો: જો સ્ટેટસ 'Processed' દેખાઈ રહ્યું હોય પણ પૈસા ન મળ્યા હોય, તો તમારા બેંક ખાતા નંબર અને IFSC કોડ જેવી વિગતો ધ્યાનથી તપાસો.

૫. રિફંડ રી-ઇશ્યૂ રિક્વેસ્ટ: જો બેંકની વિગતો સંપૂર્ણપણે સાચી હોય, છતાં પૈસા ન આવ્યા હોય, તો તમારે Refund Reissue Request દાખલ કરવી પડશે. આ રિક્વેસ્ટ દાખલ કરવાથી રિફંડની પ્રક્રિયા ફરી શરૂ થાય છે અને થોડા જ દિવસોમાં પૈસા આવી શકે છે.

ITR રિફંડમાં વિલંબના સંભવિત કારણો

રિફંડમાં વિલંબ પાછળ ઘણા કારણો હોઈ શકે છે:

• બેંક વિગતોમાં ભૂલ: બેંક ખાતા નંબર અથવા IFSC કોડમાં ભૂલ હોવી.
  
  

• ઇ-વેરિફિકેશનનો અભાવ: બેંક ખાતું ઈ-વેરિફાય ન થયેલું હોવું.
  
  

• ડેટામાં વિસંગતતા: ફોર્મ ૨૬AS અને ITR માં દર્શાવેલ રકમમાં તફાવત હોવો.
  
  

• TDS ગરબડ: TDS (ટેક્સ ડિડક્ટેડ એટ સોર્સ) વિગતોમાં ગડબડી હોવી.
  
  

• અસ્વીકાર: બેંક દ્વારા રિફંડની રકમ સ્વીકારવાનો ઇનકાર કરવો.
  
  

• આધાર લિંક ન હોવું: તમારા બેંક ખાતા સાથે આધાર લિંક ન હોવું.