ઈરાન અને ઇઝરાયલ વચ્ચેનો તણાવ હવે ખુલ્લા યુદ્ધમાં ફેરવાઈ ગયો છે. ઈરાનના સુપ્રીમ લીડર આયાતુલ્લાહ અલી ખામેનીએ બુધવારે સોશિયલ મીડિયા પ્લેટફોર્મ એક્સ પર એક પોસ્ટમાં લખ્યું કે યુદ્ધ શરૂ થઇ ગયું છે. અમે આતંકવાદી યહૂદી શાસનને કડક જવાબ આપીશું, અમે તેમના પર કોઈ દયા નહીં બતાવીએ. ખામેનીની આ જાહેરાતના થોડા સમય પછી, ઈરાને ઇઝરાયલ તરફ 25 મિસાઇલો છોડી. આ ઘટનાને બંને દેશો વચ્ચે વધતા સંઘર્ષનો પૂર્ણ યુદ્ધમાં ફેરવાવાનો સંકેત માનવામાં આવી રહ્યો છે. ઈરાને ફતહ-૧ હાયપરસોનિક મિસાઈલ દ્વારા હુમલા કરીને ઈઝરાયેલના ૧૨ સ્થળોને નિશાન બનાવ્યા છે.

ઈરાને ફરી એકવાર ઈઝરાયલ પર ભયાનક મિસાઈલ હુમલા કર્યા

ઈઝરાયલ અને ઈરાન વચ્ચે ભીષણ સંઘર્ષ હવે યુદ્ધમાં પરિણમ્યું છે. અમેરિકાના પ્રમુખ ડોનાલ્ડ ટ્રમ્પ પણ આ યુદ્ધમાં ઝંપલાવવા માટે તલપાપડ થવાની સાથે જાણે કોઈ બહાનું શોધી રહ્યા હોય તેવું સ્પષ્ટ દેખાઈ રહ્યું છે. તેમણે કહ્યું હતું કે અમે ઈરાનને સીધું આત્મસમર્પણ કરવાની ચેતવણી આપી દીધી છે. ઈરાનના સંપૂર્ણ એરસ્પેસ પર હવે અમારો કબજો છે. ત્યારે આ દરમિયાન ટ્રમ્પની ધમકી છતાં ઈરાને ફરી એકવાર ઈઝરાયલ પર ભયાનક મિસાઈલ હુમલા કર્યા.

ઈઝરાયલમાં મૃત્યુઆંક પણ 24ને પાર
 
ઈરાને આ વખતે હાઈપરસોનિક મિસાઈલ વડે ઈઝરાયલમાં તબાહી મચાવી હતી. જેના કારણે ઈઝરાયલમાં મૃત્યુઆંક પણ 24 ને પાર થઇ ગયો છે જ્યારે ઈજાગ્રસ્તોનો આંકડો 631ની નજીક છે. ઈઝરાયલને આ હુમલાઓને કારણે મોટું નુકસાન થયું છે. ઈરાને ઈઝરાયલ પર હુમલો કરવા માટે ફતાહ-1 મિસાઈલનો ઉપયોગ કર્યો હતો.

 ઈઝરાયલના હવાઈ ક્ષેત્ર પર 'સંપૂર્ણ નિયંત્રણ' મળ્યું  હતું

ઈરાની સમાચાર એજન્સીઓ અનુસાર, ઈરાનના રિવોલ્યુશનરી ગાર્ડ્સે તેલ અવીવની આસપાસના વિસ્તારોને ખાલી કરવાની ચેતવણી જારી કરી છે. રિવોલ્યુશનરી ગાર્ડ્સનું કહેવું છે કે ઈરાનની ફતાહ મિસાઈલો ઈઝરાયલના સંરક્ષણ ક્ષેત્રમાં ઘૂસી ગઈ હતી, જેનાથી તેને ઈઝરાયલના હવાઈ ક્ષેત્ર પર 'સંપૂર્ણ નિયંત્રણ' મળ્યું હતું.

અમેરિકાએ ફાઈટર જેટ મોકલ્યાં

ઇઝરાયલ-ઈરાન યુદ્ધ વચ્ચે અમેરિકા મધ્ય પૂર્વમાં ફાઇટર પ્લેન મોકલી રહ્યું છે. ઇઝરાયલ અને ઈરાન વચ્ચેના યુદ્ધ વચ્ચે આ ક્ષેત્રમાં અમેરિકન દળોને મજબૂત બનાવવા માટે, ત્રણ અમેરિકન અધિકારીઓએ જણાવ્યું હતું કે અમેરિકન સૈન્ય મધ્ય પૂર્વમાં વધુ ફાઇટર જેટ અને અન્ય યુદ્ધ વિમાનો તૈનાત કરી રહ્યું છે.

આ ફાઇટર જેટમાં શામેલ

એક અધિકારીએ જણાવ્યું હતું કે, આ તૈનાતીમાં F-16, F-22 અને F-35 ફાઇટર જેટનો સમાવેશ થાય છે. બે અધિકારીઓએ ફાઇટર જેટની તૈનાતીના રક્ષણાત્મક સ્વભાવ પર ભાર મૂક્યો, જેનો ઉપયોગ ડ્રોન અને પ્રોજેક્ટાઇલ્સને તોડી પાડવા માટે કરવામાં આવે છે.