રાજકોટમાં ચાલુ વર્ષે પૂરતો વરસાદ ન પડવાને કારણે પીવાના પાણીની ભારે વિકટ પરિસ્થિતિ ઊભી થાય તેવી સંભાવનાઓ સેવાઈ રહી હતી. રાજકોટની જનતાને દૈનિક ધોરણે પર્યાપ્ત અને પૂરતા દબાણથી પાણી પૂરું પાડતા મુખ્ય સ્રોત એવા આજી-૧ અને ન્યારી-૧ ડેમમાં જોઈએ તેવી પાણીની નવી આવક થઈ ન હતી. આ સ્થિતિને પહોંચી વળવા અને નાગરિકોને પાણીના સંકટમાંથી ઉગારવા માટે રાજકોટ મહાનગરપાલિકા દ્વારા રાજ્ય સરકાર સમક્ષ સૌની યોજના હેઠળ પાણી ફાળવવાની રજૂઆત કરવામાં આવી હતી. મહાનગરપાલિકાએ આગામી જૂન માસના અંત સુધી શહેરની તરસ છિપાવી શકાય તે માટે તબક્કાવાર ૪૦૦૦ એમએમસીએફટી નર્મદાનીર આપવા માગણી કરી હતી.

મહાપાલિકાની રજૂઆતના પગલે સિંચાઈ વિભાગ દ્વારા નર્મદાના પાણી આપવાની પ્રક્રિયા શરૂ કરવામાં આવી હતી. જોકે, ટેકનિકલ કારણોસર રાજકોટનો નર્મદાનીર પુરવઠો એકાદ સપ્તાહ માટે અચાનક અટકાવી દેવાતાં સ્થાનિક તંત્ર અને શહેરીજનોમાં ચિંતાનું મોજું ફરી વળ્યું હતું. જો સમયસર પાણીનો જથ્થો ઉપલબ્ધ ન થાય તો મહાનગરપાલિકાને ફરજિયાતપણે ધીમા દબાણે પાણી આપવું પડે અથવા આડકતરી રીતે પાણીકાપ ઝીંકવો પડે તેવી નોબત આવીને ઊભી રહી હતી.

શહેરમાં પાણીકાપની સ્થિતિ ટાળવા માટે મહાનગરપાલિકાના અધિકારીઓ દ્વારા સતત રજૂઆતો અને ફોલોઅપ કરવામાં આવ્યું હતું. આ પ્રયાસોના ફળસ્વરૂપે સિંચાઈ વિભાગે છેલ્લા બે દિવસથી સૌની યોજના હેઠળ ન્યારી-૧ ડેમમાં ફરીથી નર્મદાના નીર ઠલવવાનું પુનઃ શરૂ કરી દીધું છે. એક સપ્તાહના વિરામ બાદ ન્યારી-૧ ડેમમાં નર્મદાનીરની આવક શરૂ થતાં મહાનગરપાલિકા અને રાજકોટવાસીઓએ રાહતનો શ્વાસ લીધો છે.

જોકે, આજી-૧ ડેમમાં હજુ પુરવઠો શરૂ કરાયો નથી, પરંતુ સિંચાઈ ખાતા દ્વારા આગામી દિવસોમાં આજી-૧ ડેમમાં પણ નર્મદાના નીર ઠલવવાની પ્રક્રિયા શરૂ કરવામાં આવે તેવી પૂર્ણ શક્યતાઓ વ્યક્ત થઈ રહી છે. ન્યારી-૧ ડેમમાં સતત પાણી ઠલવાઈ રહ્યું હોવાથી રાજકોટવાસીઓને હવે આકરા ઉનાળામાં પણ પૂરતા પ્રમાણમાં અને નિયમિત રીતે પીવાનું પાણી મળી રહેશે. આમ, તંત્રના સઘન પ્રયાસોથી રાજકોટ પર તોળાતો આડકતરો પાણીકાપ અને અછતનો મોટો ખતરો હાલ તુરંત ટળી ગયો છે.