જમ્મુ-કાશ્મીરના બડગામ જિલ્લામાં સુરક્ષાદળો અને આતંકવાદીઓ વચ્ચે થયેલા એન્કાઉન્ટરમાં લશ્કર-એ-તૈયબા સાથે જોડાયેલો એક પાકિસ્તાની આતંકવાદી ઠાર મરાયો છે. સુરક્ષા દળોને વિસ્તારમાં આતંકવાદીઓની હાજરી હોવાની બાતમી મળ્યા બાદ સર્ચ ઓપરેશન હાથ ધરવામાં આવ્યું હતું. આ દરમિયાન આતંકવાદીઓ સાથે સામનો થતાં એન્કાઉન્ટર શરૂ થયું હતું.

આ સમગ્ર કાર્યવાહી સ્પેશિયલ ફોર્સિસ અને 53 રાષ્ટ્રીય રાઇફલ્સ દ્વારા સંયુક્ત રીતે હાથ ધરવામાં આવી હતી. સુરક્ષાદળોએ યૂસમર્ગના ઊંચાઈવાળા વિસ્તારોમાં સઘન સર્ચ ઓપરેશન શરૂ કર્યું હતું. તપાસ દરમિયાન આતંકવાદીઓની હાજરીની પુષ્ટિ થતાં બંને તરફથી ગોળીબાર થયો હતો.

જમ્મુ-કાશ્મીર પોલીસે જણાવ્યું કે ‘ઓપરેશન અશદાર’ દરમિયાન ઠાર કરાયેલા આતંકવાદીની ઓળખ લશ્કર-એ-તૈયબા સાથે સંકળાયેલા પાકિસ્તાની નાગરિક યાસિર તરીકે થઈ છે. પોલીસે સોશિયલ મીડિયા પ્લેટફોર્મ X પર પોસ્ટ કરીને આ કાર્યવાહી અંગે માહિતી આપી હતી.

મળતી માહિતી મુજબ યાસિર લશ્કર-એ-તૈયબાના સુલેમાન મૂસા ગ્રુપનો ભાગ હતો. જોકે, આશરે એક વર્ષ પહેલાં તે આ ગ્રુપથી અલગ થઈ ગયો હતો. ત્યારબાદ તે અલગ રીતે આતંકવાદી પ્રવૃત્તિઓમાં સક્રિય રહ્યો હોવાનું સુરક્ષા એજન્સીઓનું માનવું છે.

સુરક્ષા એજન્સીઓ છેલ્લા કેટલાક સમયથી યાસિરની ગતિવિધિઓ પર નજર રાખી રહી હતી. ખાસ કરીને યૂસમર્ગ અને આસપાસના ઊંચાઈવાળા વિસ્તારોમાં તેની હિલચાલ અંગે સુરક્ષા દળોને માહિતી મળી રહી હતી. આ ઇનપુટના આધારે સર્ચ ઓપરેશન હાથ ધરવામાં આવ્યું હતું, જે બાદ એન્કાઉન્ટર થયું હતું.

યાસિરના ઠાર થયા બાદ સુરક્ષા એજન્સીઓ હવે તેના નેટવર્ક અને લશ્કર-એ-તૈયબાના અન્ય ઓપરેટિવ્સ સાથેના સંપર્કોની તપાસ કરી રહી છે. જમ્મુ-કાશ્મીરમાં તાજેતરની આતંકવાદી ગતિવિધિઓમાં તેની કોઈ ભૂમિકા હતી કે નહીં તે અંગે પણ તપાસ ચાલી રહી છે.

સુલેમાન મૂસા, જેને હાશિમ મૂસા તરીકે પણ ઓળખવામાં આવે છે, તે પહલગામમાં 2025માં થયેલા આતંકવાદી હુમલાના મુખ્ય કાવતરાખોરોમાંનો એક હોવાનું જણાવવામાં આવ્યું હતું. હુમલા બાદ કેટલાક મહિનામાં ભારતીય સુરક્ષાદળો સાથે થયેલા એન્કાઉન્ટરમાં શ્રીનગરના દાચીગામ જંગલ વિસ્તારમાં મૂસા માર્યો ગયો હતો.

યાસિરના મોતને સુરક્ષા એજન્સીઓ માટે મહત્વપૂર્ણ સફળતા તરીકે જોવામાં આવી રહ્યું છે. હવે તપાસનો મુખ્ય ફોકસ યાસિરના સંપર્કો, નેટવર્ક અને જમ્મુ-કાશ્મીરમાં તેની સંભવિત આતંકવાદી ગતિવિધિઓ પર છે.