ગીર સોમનાથ જિલ્લાના ઉના શહેર અને સમગ્ર તાલુકામાં રખડતાં શ્વાનનો આતંક ચિંતાજનક રીતે વધી રહ્યો છે, જેના કારણે સ્થાનિક રહીશો અને રાહદારીઓમાં ભારે ફાફડાટ વ્યાપી ગયો છે. ઉના શહેર અને આસપાસના ગ્રામ્ય વિસ્તારોમાં હડકાયા થયેલા શ્વાનોએ ટૂંકા સમયગાળામાં અનેક લોકોને નિશાન બનાવ્યા હોવાની ગંભીર ઘટના સામે આવી છે. ઉના સરકારી હોસ્પિટલમાંથી મળતી સત્તાવાર વિગતો અનુસાર, માત્ર 3 કલાકના ટૂંકા સમયગાળામાં જ શ્વાન કરડવાના આશરે 27 જેટલા કેસો નોંધાતાં હોસ્પિટલ તંત્રમાં ભારે દોડધામ મચી ગઈ હતી.

છેલ્લા કેટલાક સમયથી ઉના શહેરના મુખ્ય માર્ગો, શાકભાજી માર્કેટ, રહેણાંક વિસ્તારો તેમજ ગ્રામીણ વિસ્તારોમાં રખડતાં શ્વાનોની સંખ્યામાં મોટો વધારો થયો છે. નાના બાળકો, મહિલાઓ અને વાહનચાલકો પર શ્વાન અચાનક હુમલો કરી દેતાં હોવાના બનાવો રોજિંદા બન્યા છે. માત્ર 3 કલાકમાં જ 27 જેટલા નિર્દોષ લોકોને શ્વાને બચકાં ભરી લેતાં ઈજાગ્રસ્તોને તાત્કાલિક અસરથી સારવાર અર્થે ઉનાની સરકારી હોસ્પિટલમાં ખસેડવામાં આવ્યા હતા, જ્યાં તમામ લોકોને હડકવા વિરોધી રસી (હડકવા વિરોધી ઇંજેક્શન) અને જરૂરી પ્રાથમિક સારવાર આપવામાં આવી હતી.

અધિકારીઓ અને હોસ્પિટલના આંકડા અનુસાર, પરિસ્થિતિ એટલી ગંભીર છે કે છેલ્લા 1 મહિનાના સમયગાળામાં જ ઉના સરકારી હોસ્પિટલમાં શ્વાન કરડવાના 300 જેટલા કેસો નોંધાઈ ચૂક્યા છે. ખાનગી હોસ્પિટલોમાં સારવાર લેનારા દર્દીઓની સંખ્યા ઉમેરીએ તો આ આંકડો ઘણો મોટો થઈ શકે છે. વારંવાર બનતી આવી ઘટનાઓને કારણે હવે લોકો પોતાના બાળકોને ઘરની બહાર એકલા મોકલતાં પણ અચકાઈ રહ્યા છે.

​​​​​​​સ્થાનિક રહીશો અને સામાજિક કાર્યકરો દ્વારા ઉના નગરપાલિકા અને સ્થાનિક પ્રશાસન સામે ભારે રોષ વ્યક્ત કરવામાં આવી રહ્યો છે. લોકોની માંગ છે કે પાલિકા તંત્ર દ્વારા વિલંબ કર્યા વિના તાત્કાલિક ધોરણે સમગ્ર વિસ્તારમાં સ્પેશિયલ સર્વે હાથ ધરવામાં આવે અને રખડતાં શ્વાનોનું ખસીકરણ (Stray Dog Sterilization) તેમજ હડકવા વિરોધી રસીકરણનું વ્યાપક અભિયાન શરૂ કરવામાં આવે, જેથી નાગરિકોને આ ભયજનક પરિસ્થિતિમાંથી કાયમી મુક્તિ મળી શકે.