બોમ્બે હાઈકોર્ટે તહેલકા મેગેઝિનના ભૂતપૂર્વ મુખ્ય સંપાદક તરુણ તેજપાલને 2013ના ખૂબ જ પ્રસિદ્ધ બળાત્કાર કેસમાં 10 વર્ષની જેલની સજા ફટકારી છે. હાઈકોર્ટની ગોવા બેન્ચે આજે સીમાચિહ્નરૂપ ચુકાદો આપ્યો હતો, જેમાં માપુસાની ટ્રાયલ કોર્ટના 2021ના નિર્ણયને ઉલટાવી દેવામાં આવ્યો હતો જેમાં તેજપાલને તમામ આરોપોમાંથી મુક્ત કરવામાં આવ્યા હતા. કોર્ટે હવે તેજપાલને આ કેસમાં દોષિત ઠેરવ્યા છે.

હાઈકોર્ટે ગોવા ટ્રાયલ કોર્ટના 2021ના ચુકાદાને ઉલટાવી દીધો, જેમાં તેમને નિર્દોષ જાહેર કરવામાં આવ્યા હતા. નોંધનીય છે કે માપુસા સેશન્સ કોર્ટે 2021માં તરુણ તેજપાલને તમામ આરોપોમાંથી મુક્ત કર્યા હતા. ત્યારબાદ, ગોવા સરકારે આ ચુકાદાને બોમ્બે હાઈકોર્ટની ગોવા બેન્ચમાં પડકાર્યો હતો. 

જસ્ટિસ ડૉ. નીલા ગોખલે અને જસ્ટિસ અમિત બોરકરની બનેલી ડિવિઝન બેન્ચે તેજપાલને આઈપીસીની કલમ 376(2)(એફ) અને 376(2)(કે) તેમજ કલમ 354-એ અને 354-બી હેઠળ બળાત્કાર અને જાતીય સતામણીનો દોષી ઠેરવ્યો હતો. હાઈકોર્ટે જણાવ્યું હતું કે, અમે ચુકાદો અને આદેશ રદ કર્યો છે અને તેજપાલને દોષિત ઠેરવ્યા છે. આદેશ જાહેર કરવામાં આવ્યો ત્યારે તેજપાલ કોર્ટમાં હાજર હતા. ન્યાયાધીશોને સંબોધતા, તેજપાલે ઉલ્લેખ કર્યો કે તેઓ હવે 62 વર્ષના છે અને તેમણે ઉદારતા માટે વિનંતી કરી.

તેજપાલે કહ્યું, હું 62 વર્ષનો છું, અને હું માનું છું કે હું પીડિત છું. મારી પત્ની છે, અને કહેવા માટે વધુ કંઈ નથી. હું ફક્ત એટલું જ કહી શકું છું કે કૃપા કરીને મારા પ્રત્યે ઉદારતા દાખવો. તેજપાલ વતી હાજર રહેલા વરિષ્ઠ વકીલ આબાદ પોંડાએ કોર્ટને સુપ્રીમ કોર્ટમાં અપીલ દાખલ કરવા માટે આઠ અઠવાડિયા માટે આદેશ પર સ્ટે મૂકવાની વિનંતી કરી. આ સમગ્ર કેસ 7 નવેમ્બર, 2013 ના રોજ ગોવામાં આયોજિત પ્રતિષ્ઠિત થીંક ફેસ્ટ દરમિયાન ઉદ્ભવ્યો હતો. આરોપો અનુસાર, તરુણ તેજપાલે ઇવેન્ટ દરમિયાન હોટલની લિફ્ટમાં 'તહેલકા' ની એક જુનિયર મહિલા પત્રકાર પર બળજબરીથી જાતીય કૃત્ય કરવાનો પ્રયાસ કર્યો હતો. મહિલાએ આરોપ લગાવ્યો કે તેજપાલે તેના વરિષ્ઠ પદ અને પ્રભાવનો ઉપયોગ કરીને તેની ઇચ્છા વિરુદ્ધ જાતીય કૃત્ય કરવાનો પ્રયાસ કર્યો હતો.

શું છે સમગ્ર મામલો?

નોંધનીય છે કે 2013 માં, તરુણ તેજપાલ સાથે કામ કરતી જુનિયર મહિલા પત્રકારે ગોવાની એક ફાઇવ સ્ટાર હોટલની લિફ્ટની અંદર બળાત્કારનો આરોપ લગાવ્યો હતો. તરુણ તેજપાલની 30 નવેમ્બર, 2013ના રોજ ધરપકડ કરવામાં આવી હતી. આ પહેલા, તેમણે આગોતરા જામીન માંગ્યા હતા, પરંતુ કોર્ટે તેમને કોઈ રાહત આપવાનો ઇનકાર કર્યો હતો. સાડા સાત વર્ષ પછી, 2021 માં, ગોવા સેશન્સ કોર્ટે તેમને બધા આરોપોમાંથી મુક્ત કર્યા હતા.