જમ્મુ કાશ્મીરમાં ટેમ્પો ટ્રાવેલર 60 ફૂટ ઊંડી ખીણમાં ખાબક્યું, ગુજરાતનાં 18 પ્રવાસીને ઈજા, 6ની હાલત ગંભીર 

​જમ્મુ-કાશ્મીરના પ્રખ્યાત પ્રવાસન સ્થળ સોનમર્ગથી શ્રીનગર પરત ફરી રહેલા પ્રવાસીઓનું એક ટેમ્પો ટ્રાવેલર અકસ્માતનો ભોગ બન્યું છે. ગાંદરબલ જિલ્લાના કંગન વિસ્તારમાં ગુન્ડ પાસે વાહન અનિયંત્રિત થઈને આશરે 60 ફૂટ ઊંડી ખીણમાં ખાબક્યું હતું. આ ગંભીર દુર્ઘટનામાં ગુજરાતના અમદાવાદ અને સુરતના પ્રવાસીઓ સહિત કુલ 18 લોકો ઈજાગ્રસ્ત થયા છે.

​વાહન પરથી કાબૂ ગુમાવતા સર્જાઈ દુર્ઘટના

​પ્રાપ્ત માહિતી અનુસાર, પ્રવાસીઓથી ભરેલું ટેમ્પો ટ્રાવેલર સોનમર્ગની સુંદરતા માણીને શ્રીનગર તરફ જઈ રહ્યું હતું. રસ્તામાં કંગન પાસે પહોંચતા જ ચાલકે વાહન પરથી કાબૂ ગુમાવી દીધો હતો, જેના કારણે ગાડી રોડ પરથી લપસીને સીધી 60 ફૂટ નીચે ખીણમાં પડી ગઈ હતી. અકસ્માતના આ ભયાનક દ્રશ્યને જોઈને આસપાસના લોકો તરત જ મદદે દોડી આવ્યા હતા.
​રેસ્ક્યુ ઓપરેશન અને ઘાયલોની સ્થિતિ
​ઘટનાની જાણ થતા જ સ્થાનિક પોલીસ અને પ્રશાસન દ્વારા ત્વરિત બચાવ કામગીરી હાથ ધરવામાં આવી હતી. સ્થાનિક લોકોની મદદથી તમામ ઘાયલોને ખીણમાંથી બહાર કાઢીને તાત્કાલિક પ્રાથમિક સ્વાસ્થ્ય કેન્દ્ર (PHC) ગુન્ડ ખાતે ખસેડવામાં આવ્યા હતા. આ અકસ્માતમાં ડ્રાઈવર સહિત કુલ 18 મુસાફરો ઘાયલ થયા છે, જેમાંથી 6 થી 8 લોકોની હાલત અત્યંત ગંભીર હોવાનું જાણવા મળ્યું છે.

​શ્રીનગરની હોસ્પિટલમાં સારવાર ચાલુ

​પ્રાથમિક સારવાર આપ્યા બાદ ગંભીર રીતે ઘાયલ થયેલા પ્રવાસીઓને વધુ સારવાર માટે શ્રીનગરની એસકેઆઈએમએસ (SKIMS) હોસ્પિટલમાં રિફર કરવામાં આવ્યા છે. આ દુર્ઘટનામાં ગુજરાત ઉપરાંત પશ્ચિમ બંગાળ અને પંજાબના પ્રવાસીઓ પણ સામેલ છે. જમ્મુ-કાશ્મીરના ઉપરાજ્યપાલ મનોજ સિન્હાએ આ દુર્ઘટના અંગે ઊંઘું દુઃખ વ્યક્ત કરીને હોસ્પિટલના વહીવટી તંત્રને ઘાયલોને શ્રેષ્ઠ અને ઝડપી તબીબી સહાય પૂરી પાડવા માટે કડક નિર્દેશો આપ્યા છે.