રાજકોટ ભાવનગર રોડ પર ગઢકા ગામની સીમમાં આવેલા વાડીના કુવામાં ડૂબી જતા યુવકનું મોત નીપજ્યું હતું. ખેતીકામ કરતો યુવક કુવામાં પાણી ભરવા માટે ગયો હતો દરમિયાન શરીરનું બેલેન્સ ગુમાવી દેતા પગ લપસ્યો હતો અને કુવામાં ખાબકતા બનાવ બન્યો હતો.

પ્રાપ્ત વિગત મુજબ ગઢકા ગામે અશોકભાઇ કલોલાની વાડીમાં રહી ખેતમજૂરી કરતો મુકેશભાઇ છનાભાઇ નાયકા (ઉ.વ.૩૫)નો યુવક કાલે રાતે અગીયારેક વાગ્યે વાડીમાં આવેલા કૂવામાંથી પાણી ભરતો હતો ત્‍યારે પગ લપસી જતા કુવામાં અંદર પડી ગયો હતો. કેટલીક વાર સુધી પરત ન આવતા પરિવારજનો જોવા જતા યુવક કુવામાં પડી ગયાનું માલુમ પડ્યું હતું. તાકીદે વાડી માલિકને જાણ કરી હતી અને આસપાસના ખેતરમાં કામ કરતા લોકો ભેગા થઇ હતા તેને બેભાન હાલતમાં બહાર કાઢ્યો હતો અને 108ને જાણ કરતા ઇએમટીએ જોઈ તપાસી મૃત જાહેર કરતા પરિવારમાં ગમગીની છવાઈ હતી. બનાવની જાણ આજીડેમ પોલીસને કરવામાં આવતા હેડકોન્‍સ. એમ. ડી. મુંધવા સહિતનો સ્ટાફ સ્થળ પર પહોંચી મૃતદેહને પીએમ માટે સિવિલ હોસ્પિટલમાં ખસેડી જરૂરી કાર્યવાહી કરી હતી.