વિક્રમ સંવત ૨૦૮૨ની અંતિમ પૂનમે દ્વારકામાં ભાવિકોનું ઘોડાપૂર

ભગવાન શ્રી દ્વારકાધીશની પાવન નગરી દ્વારકામાં વિક્રમ સંવત ૨૦૮૨ની અંતિમ પૂર્ણિમા નિમિત્તે શ્રદ્ધા અને ભક્તિનો અનોખો માહોલ જોવા મળ્યો હતો. આસો માસની પૂનમના પવિત્ર અવસરે ગોમતી નદીમાં સ્નાન કરવા અને જગતમંદિરમાં બિરાજમાન કાળિયા ઠાકોરનાં અલૌકિક દર્શનનો લાભ લેવા મોટી સંખ્યામાં ભાવિકો દ્વારકા ઉમટી પડ્યા હતા. વહેલી સવારથી જ યાત્રાધામમાં ભક્તોની ભારે અવરજવર જોવા મળી હતી.

દ્વારકાધીશના દર્શન માટે મંદિરના દ્વારે ભાવિકોની લાંબી કતારો જોવા મળી હતી. મંદિરના દ્વાર સવારે છ વાગ્યે ખુલતાં જ ભાવિકોએ પવિત્ર ગોમતી નદીમાં સ્નાન કરી છપ્પન સીડી ચડી સ્વર્ગદ્વાર મારફતે જગતમંદિરમાં પ્રવેશ કર્યો હતો. ત્યારબાદ ભક્તોએ કાળિયા ઠાકોરનાં દિવ્ય દર્શન કરી ધન્યતા અનુભવી હતી. ભગવાનનાં મનમોહક દર્શનથી ભાવિકો ભાવવિભોર બન્યા હતા અને સમગ્ર મંદિર પરિસર ભક્તિમય વાતાવરણથી ગુંજી ઊઠ્યું હતું.

દ્વારકા યાત્રાધામમાં દર મહિનાની પૂનમનું વિશેષ ધાર્મિક મહત્ત્વ હોવાથી ગુજરાત સહિત વિવિધ વિસ્તારોમાંથી શ્રદ્ધાળુઓ દર્શનાર્થે આવતા હોય છે. તેમાં પણ વિક્રમ સંવત ૨૦૮૨ની અંતિમ પૂનમ હોવાથી ભાવિકોમાં વિશેષ ઉત્સાહ જોવા મળ્યો હતો. ગોમતી સ્નાન અને દ્વારકાધીશનાં દર્શન કરવાની પરંપરાને અનુસરીને વહેલી સવારથી જ મોટી સંખ્યામાં શ્રદ્ધાળુઓએ ભગવાનનાં ચરણોમાં શીશ નમાવી પરિવારની સુખ-સમૃદ્ધિ અને કલ્યાણ માટે પ્રાર્થના કરી હતી.

આમ, આસો પૂનમના પવિત્ર પર્વે દ્વારકામાં ભક્તિ, આસ્થા અને ધાર્મિક પરંપરાનો ત્રિવેણી સંગમ સર્જાયો હતો. યાત્રાધામમાં ઉમટેલા ભાવિકોના માનવ મહેરામણથી દ્વારકાની ગલીઓ અને જગતમંદિર પરિસર ધર્મમય બની રહ્યાં હતાં.