આ બન્ને પત્રો નનામી છે પરંતુ ગંભીર બાબત એ છે કે આજે સવારના અખબારમાં ડો. વિજય પોપટ વિ‚દ્ધ નનામી પત્રનો અહેવાલ સામે આવ્યા બાદ કલાકોની અંદર જ આજે જ મેડીકલ કોલેજના ડીન અને અધિક ડીન સામે નનામી પત્ર આપવામાં આવ્યો છે. એવું સ્પષ્ટ થાય છે કે જી.જી. હોસ્પિટલમાં સુપ્રિન્ટેન્ડન્ટની કચેરી અને મેડીકલ કોલેજના ડીનની કચેરી વચ્ચે ઘેરો વિવાદ છે, મતભેદ છે, અને આ ઘણા સમયથી ચાલ્યું આવતુ હોવાનું સમજી શકાય છે અને આખરે નનામી પત્રો દ્વારા એકબીજા પર એટેક કરવામાં આવ્યા હોવાનું માનવામાં આવે છે. 

બન્ને નનામી પત્રોની નકલ રાજયનાં આરોગ્ય વિભાગ સુધી પહોંચ્યા બાદ ગુજરાત સરકાર અને આરોગ્ય મંત્રાલય શું એકશન લેશે તેના પર સ્વાભાવિક રીતે બધાની નજર રહેશે કારણકે નનામી પત્રોમાં થયેલા આક્ષેપો ખુબ જ ગંભીર પ્રકારના છે અને તપાસ થવાની શકયતા નકારી શકાતી નથી.

જી.જી. હોસ્પિટલ સૌરાષ્ટ્રની અત્યંત મહત્વની અને ગરીબો માટે એક​​​​​​​ પ્રકારે સંજીવની સમાન છે, આ હોસ્પિટલમાં જે  જવાબદારો છે  તેમની વચ્ચે સામસામે તલવારો ખેંચાયેલી રહેશે તો સ્વાભાવિક રીતે તેમની વિપરિત અસર દર્દીઓ પર પડશે અને આ બાબત આરોગ્ય મંત્રાલય માટે પણ વિચાર માંગી લેતી છે. 

હોસ્પિટલના વતુળોમાં જે ચર્ચાઓ ચાલી રહી છે અને હોસ્પિટલના કેટલાક સંનિષ્ઠ સુત્રો તરફથી એવા પણ સંકેત મળ્યા છે કે જયારથી ઇન્ચાર્જ સુપ્રિડેન્ટ તરીકે વિજય પોપટની નિમણુંક થઇ છે ત્યારથી કોઇપણ કારણે વિવાદ ઘેરા બની રહ્યા છે અને હોસ્પિટલને ઇનડાયરેકટ રીતે અખાડા સમાન બનાવી દેવામાં આવેલ છે. 

અત્રે એ બાબત પણ ખૂબ જ નોંધપાત્ર છે અને ઘ્યાને લેવા જેવી છે કે, હોસ્પિટલના ઇન્ચાર્જ સુપ્રિટેડેન્ટ ડો. વિજય પોપટ સામે નેશનલ મેડીકલ કમિશનમાં ફરિયાદ થઇ હોવાના અહેવાલો બહાર આવ્યાના જ દિવસે ડીન અને અધિક ડીન સામે નનામી પત્રો આવ્યા હોવાથી એવી પણ શંકા જાગે છે કે શું ડો. વિજય પોપટ સામે થયેલી ફરિયાદને દબાવી દેવા અને નવો વિવાદ જગાવવાના ઇરાદા સાથે તો ડીન અને અધિક ડીન સામે નનામી પત્ર લખવામાં આવેલ નથી ને ? આ બાબત પણ આરોગ્ય મંત્રાલય તપાસમાં આવરી લેશે એવું માનવામાં આવે છે.